Himbriminn
 
Himbriminn er klárlega minn uppáhalds fugl og ljósmyndadellan er þeim kostum búin að hún
dregur mann út í náttúruna og hvetur til hreyfingar sem hverjum manni er holl. Svo er auðvitað ekki leiðinlegt
að fá svona bónusa eins og þennan, að komast í nálægð við Himbrimann sitjandi á óðali sínu. 
 

Á auðvelt með að hrífast af landslagsmyndum

 

- Jón Steinar Sæmundsson er nánast alltaf með myndavél við höndina

 
Jón Steinar Sæmundsson er fæddur á Ísafirði 30. júní en fluttist til Grindavíkur,
sem hann kallar Nafla alheimsins, á fyrsta ári. Jón Steinar lauk grunnskólagöngu í Grindavík og
fór í framhaldinu í Fjölbrautaskóla Suðurnesja og nam þar húsasmíði að mestu leiti,
án þess þó að ljúka náminu. Hann starfar í dag sem tæknistjóri hjá Vísi h/f í Grindavík og sér um
viðhald á vélum og búnaði í saltfiskvinnslu fyrirtækisins í Grindavík. Þegar Jón Steinar er ekki í vinnunni
þá er hann út um allar koppa grundir með myndavélina.
 
— Hvenær fékkstu áhuga á ljósmyndun?
Váhh. Þetta er stór spurning. Ég vil meina að ég hafi alltaf haft áhuga á ljósmyndun og alltaf
dáðst af fallegum myndum. Fyrsta alvöru myndavélin mín var Canon 40D.
 
— Hvað kveikti áhugann?
Stórt er spurt. Hver hefur ekki setið eða staðið fyrir framan fallega mynd og dáðst að? Ég á auðvelt með
að hrífast af landslagsmyndum og myndum sem tengjast sjónum á einhvern hátt
og held að þannig myndir hafi kveikt í mér í upphafi.
 
— Hvernig er ljósmyndataskan í dag? Hvaða vél og linsur eru
í töskunni og hvaða linsu ertu oftast að nota?
Í dag er ég að nota tvær vélar, annars vegar Canon 7D og hins vegar er það Canon 7D Mark II.
Ég nota Canon EF 100 - 400mm aðdráttarlinsu aðallega þegar að ég er að mynda báta koma
að landi og svo nota ég Canon 16 - 35mm í nánast allt annað og bæti við hana „filterum“ og öðru
sem við þarf að éta. Svo leynist reyndar í töskunni Samyang 2,8 - 14mm sem er dregin upp þegar
norðurljósin sýna sig. Það er eitthvað fleira dót í pokunum en það er dýpra á því.
 
— Hvar liggur áhugasvið þitt í ljósmynduninni? Bátar eru þér hugleiknir.
Já, bátar eru mér nánast allt, ef svo má segja. Maður er náttúrulega alinn upp við sjávarsíðuna
og kemst þar af leiðandi ekki undan því að hrífast af því sem gengur á í kringum mann og
eitt af því er náttúrulega sjórinn og allt í kringum hann. Hetjurnar sem
voru á bátunum og einnig bátarnir sjálfir. Allt átti þetta sína sögu, og að
heyra sögur þegar maður var að alast upp af Willard eða Venna á Grindvíking, Ölver á Geirfugli,
Svenna Ísaks á Hrafni og Helga á Hafberginu þegar að þeir lentu í mokfiskiríii eða lentu í brjáluðu
veðri og þar fram eftir götunum. Það kveikti ákveðinn áhuga og ljóma yfir sjómennsku og bátum.
 
— Ég geri ráð fyrir að þú hafir varið mörgum klukkustundum við innsiglinguna
í von um rétta augnablikið? Hefur þú náð því?
Já, innsiglingin hefur verið á köflum mitt annað heimili og ég hef, þó ég segi sjálfur frá,
náð nokkuð góðum myndum, en svo kemur alltaf upp kappið í manni að ná betri mynd en
maður náði síðast. Þannig að svarið við þessari er já, ég er búinn að fanga rétta augnablikið,
en á bara eftir að ná því „örlítið“ réttara.
 
— Þú hefur einnig gaman af því að mynda fugla. Áttu þér uppáhalds fugl?
Já, ég hef gaman að því að mynda fugla og einnig að fylgjast með þeim, þó svo að ég hafi
ekki sökkt mér í það að mynda þá. Það sagði mér maður sem er í fuglaljósmyndun;
„Þegar að þú ferð af fullum krafti í fuglana, þá getur þú kysst allt annað bless.“
Þannig að ég hef ekki farið að krafti í það frekar en golfið.
 
Uppáhaldsfuglinn minn er tvímælalaust himbriminn. Ég hef bæði þurft að slást
við að ná góðum myndum af honum og einnig lent í slagsmálum við að greiða
hann úr silunganetum. Kröftugur fugl sem að ég ber ómælda virðingu fyrir.
 
— Ferðu í sérstakar ljósmyndaferðir eða ertu bara með
myndavélina til taks ef þú sérð eitthvað áhugavert?
Ég fer í ljósmyndaferðir af og til þegar færi gefast og hins vegar þá er ég nánast
alltaf með vélarnar með mér þegar ég er á ferðinni utan vinnutíma.
Ég hafði marg oft lent í því að kíkja út um gluggann og ákveða, nei það er
ekkert sérstakt veður, eða skyggni og ekkert að sjá og þar fram eftir götunum...
Svo sá maður eitthvað, en engin vél með í för. Þannig að núna hef ég
tamið mér að grípa vélarnar alltaf með.
 
— Ertu að fara um landið til að mynda eða er „nafli alheimsins“
og hans nánasta umhverfi þitt svæði?
Nafli alheimsins er náttúrulega mitt svæði. En, jú ég rata alveg út fyrir grindahliðið
og geri mér reglulega ferðir víðar um land.
 
— Hefur þú haldið sýningu eða stendur til að gera slíkt?
Nei, ég hef ekki haldið sýningu en það hefur verið orðað við mig nokkrum sinnum
að gera slíkt. Þá kikkar félagsfælnin inn. Nei, það hefur bara aldrei orðið af því, einhverra hluta vegna.

Í dag er ég að nota tvær vélar, annars vegar Canon 7D og hins vegar er það Canon 7D Mark II. Ég nota Canon EF 100 - 400mm aðdráttarlinsu aðallega þegar að ég er að mynda báta koma að landi og svo nota ég Canon 16 - 35mm í nánast allt annað og bæti við hana „filterum“ og öðru sem við þarf að éta. Svo leynist reyndar í töskunni Samyang 2,8 - 14mm sem er dregin upp þegar norðurljósin sýna sig. Það er eitthvað fleira dót í pokunum en það er dýpra á því.

 
Norðurljósin
 
Norðurljósin eru magnað fyrirbæri og heilla ábyggilega meirihluta ljósmyndara
og er undirritaður þar engin undantekning. Þessi mynd er kannski mín besta en
skorar samt hátt þar sem að þetta líka magnaða stjörnuhrap rataði inn á hana.
Það eru svona augnablik sem gera það fullkomlega þess virði að standa
klukkutímum saman úti í kaldri nóttinni, og maður fer sáttur á koddann.
Ágúst GK í brimi
 
Áhugi minn á bátum og bátamyndum hefur sjálfsagt ekki farið fram hjá neinum.
Það að hafa alist upp í kringum sjóinn og séð bátana koma að í alls kyns veðrum
getur ekki gert annað en að byggja upp hjá manni ákveðna virðingu fyrir hafinu og þeim
mönnum sem það sækja. Þessi mynd finnst mér sýna svo vel hvaða krafta menn eru að
slást við þegar sótt er yfir vetrartímann og veður eru válynd. Tek hatt minn ofan fyrir
sjómönnum þessa lands. Það eru myndir eins og þessi sem að gera þetta brölt þess
virði að halda áfram og gera betur. Reyna að ná betri mynd næst...
 
Sólstafir yfir Járngerðarstaðasundi
 
Þetta er mynd sem að er tekin út yfir Járngerðarstaðasundið
(innsiglingin til Grindavíkur). Eftir að ég tók upp þá reglu að hafa alltaf myndavélarnar
með mér, brenndur af því svo oft að hafa ákveðið að nú væri veður og skyggni svo
leiðinlegt og lélegt og örugglega ekkert að sjá, en lenda svo í því myndavélalaus að sjá
eitthvað sniðugt. Þá er þetta einmitt dæmi mynd tekna á þannig degi. Ekkert nema
dumbungur og drungi og svo allt í einu búmm, himininn opnast og þessir líka fallegu
sólstafir stinga sér niður. Ljósmyndarinn fór glaður heim þarna í stað þess að
vera bölvandi yfir því að hafa ekki tekið græjurnar með.
 
Sama rjúpan skotin tvisvar!
 
Þetta er ekki besta myndin sem að ég hef tekið, en í mínum huga er þetta magnaðasta '
„mómentið“ sem ég hef fangað. Ég fékk að fljóta með bróðir mínum sem er mikill
veiðimaður á rjúpu og ég kom auga á þessa og byrjaði að mynda. Þar sem að ég var
að mynda þá læddist bróðir minn til hliðar við mig án þess að ég yrði hans var og hleypti
af og þarna er þetta rjúpugrey í miðju hagléli. Ég vill meina að þetta sé óheppnasta rjúpa í
heimi, skotin tvisvar á sama augnablikinu með myndavél og haglara.
 

Jón Steinar - Yfirheyrsla!

— Hvaða tegund af tannkremi notar þú?
Kolgata.
 
— Síðasta kvöldmáltíðin?
Hverslags spurning er þetta? Ég er ekki dauður enn og hef þar
af leiðandi ekki borðað síðustu kvöldmáltíðina enn.
 
— Brenndur eða grafinn?
Pottþétt grafinn. Eftirlifendur skulu sko fá að hafa fyrir mér.
 
— Hvað setur þú á pylsuna?
Allt nema þetta aukarugl sem að Akureyringar og nærsveitamenn tóku upp á að troða með í brauðið.
 
— Hvar lætur þú klippa þig?
Þar sem maður er nú að mestu vaxinn upp úr gærunni, þá fer
rúningurinn á því litla sem að eftir er bara fram heima fyrir.
 
— Borðar þú svið?
Já. Ég svoleiðis gúffa þeim í mig eins og enginn sé morgundagurinn og þetta séu
hreinlega síðustu sviðin í heiminum, en sé svo eftir öllu að loknum síðasta bitanum.
 
— Hvað gerir þú milli klukkan 5 og 7 á daginn?
Oftast nær fer þessi tími í vinnu. En ef heppnin er með
manni þá kemst maður fyrr út með myndavélina.
 
— Súrmaturinn eða pottrétturinn?
Súrmaturinn. Pottrétturinn er bara ekki minn tebolli.
 
— Hvað ertu með í vinstri vasanum?
Ekkert. Sit á vasalausri brókinni að skrifa svörin við þessum spurningum.
 
— Hver væri titill ævisögu þinnar?
Þetta reddast.
 
— Hver er draumabíllinn?
Ford F 450. Bara af því að Trump er mættur á svæðið og hafnar öllu loftslagsruglinu.
Þá er um að gera að fá sér eitthvað sem að eyðir öllu sem að maður setur á hann og helst helling í viðbót.
 
— Ferðu í kirkju?
Já. Brúðkaup og jarðarfarir. Algjör óþarfi að fara oftar.
 
— Innanlandsflug til Keflavíkurflugvallar?
Hvernig dettur mönnum í hug að Grindvíking langi að fljúga til Keflavíkur?
 
— Fallegasti staður á landinu?
Fyrir utan Nafla alheimsins (Grindavík), þá er skora gotstöðvarnar, Ísafjörður, hátt hjá mér.
 
— Kjöt eða fiskur?
Jafn vígur á bæði, þó svo að góð steik toppi allt.
 
— Evrópuferð eða Ameríku?
Evrópuferð fyrir allan peninginn. Hef engan áhuga að að skoða nagdýrið á hausnum á Trump.
 
— Gist í fangaklefa?
Nei, til hvers?
 
— Sturta eða bað?
Sturta, takk.
 
— Hver er besta ákvörðun sem þú hefur tekið?
Ég er alveg örugglega ekki búinn að taka hana ! Eða.... er ég?
 
— Hvaða sögu hafa foreldrar þínir endurtekið sagt af þér?
Hversu góður og stilltur ég var sem barn. Alveg satt!
 
— Furðulegasti matur sem þú hefur borðað?
Surströmming. Þetta er rotin síld frá Svíþjóð og er algjör viðbjóður
sem að hvorki er á borð bjóðandi eða á vetur setjandi.
 
— Hvað er það neyðarlegasta sem þú hefur lent í ?
Það er án efa hláturkast í biðröð á leið í bíó fyrir all nokkrum árum með vini og til að bjarga
andlitum okkar og forðast hneykslan annara í röðinni, þá stukkum við fyrir horn til að jafna
okkur sem að tók þó nokkurn tíma. Þegar við höfðum tekið okkur saman
í andlitinu og komum aftur fyrir hornið hafði röðin ekkert hreyfst.
 
— Hver er fyrsta endurminning þín?
Sem lítill pjakkur á þríhjóli í Betra hverfinu (Þórkötlustaðahverfi).
 
— Sameinuð sveitarfélög á Suðurnesjum eða áfram eins og nú?
Áfram eins og nú. Okkur Grindvíkingum þykir ekki leiðinlegt að skilja Keflvíkinga eftir í reyknum.